Naglunsyar sang kick-off ceremony ang Philippine National Police (PNP) subong nga Martes, Hunyo 24, bilang pagsugod sang ila Regular Physical Conditioning Program ukon Pulisteniks para sa mga miyembro sang kapulisan.
Ini nga programa kabahin sang pagsunod sang bug-os nga hanay sang PNP sa mando ni PNP Chief PGen. Nicolas Torre III nga magpatuman sang weight loss program para sa mga pulis nga sobra sa timbang.
Una na ginpahayag ni PGen. Torre nga ang mga pulis nga indi magpanaog timbang sa sulod sang isa ka tuig posible nga masibak sa ila pwesto bilang kabahin sang disiplina kag pagpasanyog sang performance sang kapulisan.
Tuuyo sang programa nga siguruhon nga ang mga pulis maalwan ang lawas, aktibo, kag preparado sa physical nga aspeto para mas epektibo nga makaserbisyo sa katawhan kag sa ila mga responsibilidad.
