Mariing kinondena ng Philippine National Police (PNP) ang tinawag nitong “walang saysay at duwag na ambush” laban sa kanilang mga tauhan sa Shariff Aguak, Maguindanao del Sur noong gabi ng Marso 28, 2026, na nagresulta sa pagkamatay ng limang (5) pulis at pagkasugat ng tatlo (3) pa.
Ayon sa ulat, inatake ng mga hindi pa nakikilalang armadong suspek ang mga miyembro ng 2nd Provincial Mobile Force Company habang pauwi na sa kanilang detatsment matapos magsagawa ng patrol at police visibility operations.
Tinukoy ng PNP ang insidente bilang isang karumal-dumal na krimen na direktang pag-atake sa mga alagad ng batas at banta sa kapayapaan at kaayusan.
Agad na isinugod sa mga kalapit na ospital ang mga sugatang pulis at kasalukuyang ginagamot.
Ayon kay PNP Chief Police General Jose Melencio Nartatez Jr., naglunsad na ang ahensya ng pinaigting na hot pursuit operations, katuwang ang Armed Forces of the Philippines, upang matukoy at madakip ang mga responsable sa krimen.
Tiniyak ng PNP na ginagawa nila ang lahat ng kinakailangang hakbang upang makamit ang hustisya para sa mga biktima at kanilang mga pamilya.
Nagpaabot din ng pakikiramay ang pulisya sa pamilya ng mga nasawi, na kanilang inilarawan bilang mga pulis na nagpakita ng katapangan at dedikasyon sa tungkulin.
Binigyang-diin ni Nartatez na hindi sila uurong sa paghahanap ng katarungan at hindi palalampasin ang naturang pag-atake, at aniya’y mananagot ang mga salarin.
Sa kasalukuyan, nagpapatuloy ang operasyon ng mga awtoridad sa lugar habang lalo pang pinahihigpit ang seguridad sa Shariff Aguak at mga kalapit na komunidad.
