KORONADAL CITY – Ginaimbestigaran na subong sang PNP ang balita nga gun runner ukon supplier nga taga-Polomolok, South Cotabato nga responsable suno pa sa paghatag sang madamo nga armas sa private army ni KAPA founder Joel Apolinario.
Sa interbyu sang Bombo Radyo Koronadal kay Atty. Francis Carlos, isa ka private attorney sa probinsya, nga dapat imbestigaran sang kapulisan ang nasambit nga report agud mapanabat man ini sa layi, bangud kakunsabo ini sang nadakpan nga investment scam founder.
Magluwas diri, ginpahayag man ni Atty. Carlos nga mahimo man nga mapasakaan sang kaso ang mga katapo sang media station, mga indibidwal ukon bisan mga lokal nga mga opisyal nga nagpahayag sang suporta kay Apolinario.
Nagapanawagan man si Atty. Carlos sa tanan nga mga nabiktima nga investors sang Kabus Padatoon nga magpadulong sa talatapan sang National Bureau of Investigation kag magsang-at sang kaso agud madugangan ang mga kaso nga ginapangatubang sang nadakpan nga KAPA founder nga si Joel Apolinario, ang asawa sini nga si Reina kag mga alipores sini, kag agud mabawi ang kwarta nga ila ginpain diri.
