KORONADAL CITY- Madinalag-on nga gingabot sang kapulisan ang malapad nga talamnan sang Marijuana sa Sitio Datal Alyong, Brgy. Danlag sa banwa sang Tampakan, South Cotabato.
Sa impormasyon nga ginpalab-ot sa Bombo Radyo Koronadal sang hepe sang Tampakan Municipal Police Station nga si PSI Rafael Banggay Jr. ginhimo ang pagsalakay kaina sang kaagahon sa nasambit nga Sitio sang gintingob nga pwersa sang Tampakan PNP, Provincial Mobile Force Company 1st Maneuver Platoon, 1205th Regional Mobile Force Company kag sa koordinasyon sang Barangay Officials sang Danlag kaupod na ang Tribal chieftain sang nasambit nga lugar.
Sa ginpatigayon nga operasyon gingabot sang mga otoridad ang yara sa masobra 3,000 ka puno sang fully grown marijuana nga nagakantidad sang P750,000.00.
Samtang padayon naman nga ginalagas sang mga otoridad ang tag iya sang nasambit nga talamnan pati na ang mga kaupdanan sini.
Nahibaluan nga ang nasambit nga operasyon ang bunga sang mas ginpahugtan nga kampanya sang PNP batuk sa iligal nga droga.
