KORONADAL CITY – Gindagsa sang mga manugbakal ang Php29 kada kilo nga barato nga bugas nga ginabaligya sa Kadiwa sang Pangulo sa Gensan Drive, Koronadal City nga ginpangunahan sang National Irrigation Administration of NIA Region 12.
Sa interview sang Bombo Radyo Koronadal kay Ginang Theresa Ibarra, Supervising Institutional Development Officer sang NIA XII, kaagahon pa lamang may nagalinya na rason nga sa baylo nga alas-7:00am pa sila magasugod sa pagbaligya, ginsuguran nila ang releasing sang bugas alas-6 pa lamang sang aga.
Nahibaluan nga bangud limitado lamang ang ginabaligya nga bugas sa Kadiwa store, nagapanghatag sila sang priority numbers sa mga ginakabig nga vulnerable sectors.
Ginpahugtan man nila ang pagkilatis sa mga Identification Cards sang mga nagabakal bangud sa may mga nadakpan nga nagagamit sang ID sang ila mga himata nga senior citizen nga napatay na.
Nagarequire man ang mga ini sang authorization kun indi pwede nga makapila ang mga PWD’s agud nga mabaligyaan sang bugas ang mga ginpalihog nila nga magbakal.
Kaangot sini, nagahingyo man sang paghangop si Ibarra nga indi tanan ang maka-avail bangud sa limitado nga suplay sang bugas.
Nagapanawagan man ini sa tanan nga mangin kalmado kag temprano nga magpila kada Biyernes sa Kadiwa Store agud makabakal sang mas barato nga bugas.
Ginkalipay man sang mga nakabakal sang bugas bangud nga may pagatig-angon na sila sa sulod sang pila ka adlaw.
Apang, may mga nagahingyo naman nga kuntani sa iban nga lugar sa South Cotabato may pagatukuron man nga Kadiwa Store agud nga maka-avail man sila sang Php29 nga bigas.
