Gin-deklara ni President Ferdinand Marcos Jr. ang Marso 20, 2026 bilang regular holiday sa bug-os nga pungsod sa pag-obserbar sang Eid’l Fitr.
Ang Eid’l Fitr ginaselebrar sang mga Muslim sa sulod sang tatlo ka adlaw bilang pagtapos sang Ramadan, ang balaan nga bulan sang Islam.
Nag-umpisa ang Ramadan sang Pebrero 19 sini nga tuig.
Samtang nagapreparar ang Muslim community sa pagselebrar sang Eid’l Fitr kaupod ang ila pamilya kag komunidad, ginpalab-ot sang Malacañang ang ila pagtamyaw sa tanan nga Muslim sa Pilipinas kag sa bilog nga kalibutan.
Samtang sa ginpatigayon nga Grand Iftar sa Malacañang, nag-upod si President Marcos sa mga miyembro kag lider sang Muslim community gikan sa nagkalain-lain nga bahin sang pungsod.
Sa amo nga okasyon, ginpasiguro sang pangulo ang pagrespeto sang gobyerno sa mga tradisyon kag daku nga kontribusyon sang mga Filipino Muslim sa pungsod.
