Madayon ang natalana nga biyahe ni Pangulong Ferdinand Marcos Jr. sa Canada para sa apat ka adlaw nga official visit sa tunga sang hublag protesta sang Iglesia ni Cristo.
Suno kay Presidential Communications Office Secretary Dave Gomez, wala sang pagbag-o sa schedule sang Pangulo sa diin natalana ini nga magabiyahe kaupod ang iya delegasyon humalin Hulyo 1 tubtob Hulyo 4.
Ini ang basi sa imbitasyon ni Canadian Prime Minister Mark Carney sa tinutuyo nga mapalapad pa ang koneksyon sang Pilipinas kag Canada sa aspeto sang negosyo, pamuhunan, depensa, enerhiya, artificial intelligence kag madamo pa.
Nahibaluan sa nasambit nga official visit, natalana nga magahiwat sang bilateral meeting si Marcos kag si Carney agud mas mapabakod ang relasyon kag strategic cooperation sang Pilipinas kag Canada.
Samtang, ginalauman man nga makipagsapol si PBBM sa Canadian business leaders kag investors agud makaganyat sang dugang nga investment para sa Pilipinas.
