KORONADAL CITY – Nagpaathag ang alkalde sa banwa sang Banga angot sa suno pa hinali nga paglubong sa 33 anyos nga babaye nga suspected COVID-19 patient nga napatay sa COVID center sa probinsya.
Kasunod ini sa reklamo sang pamilya sang nasambit nga suspected COVID-19 patient bangud sa paglubong diri apesar wala pa sang resulta sang swab test sini.
Sa eksklusibo nga interbyu sang Bombo Radyo Koronadal kay Banga Mayor Albert Palencia, una nga na-confine sa South Cotabato Provincial Hospital ang pasyente bangud sa balatian nga diabetes apang bangud nagaubo ini, gin-refer ini sa COVID center sa banwa sang Surallah kag didto ginbawian sang kabuhi.
Indi man matumod sang alkalde kun locally stranded individual (LSI) ukon returning overseas Filipinos (ROFs) ang napatay nga suspected COVID patient.
Ginpasiguro naman ni Mayor Palencia nga sa tion nga magguwa ang resulta kag magpositibo ini, gilayon sila nga magapatigayon sang contact tracing.
Nakahanda man ang alkalde nga istoryahon ang pamilya sini angot sa nasambit nga isyu.
