KORONADAL CITY – Apisar nga nakabaton na sang partial nga hustisya ang pamilya sang mga biktima sang massacre, nagahulat gihapon sila sang bug-os nga hustisya.
Ini ang nangin pahayag ni Jhan Chiene Maravilla, bata ni Bombo Bart Maravilla, sa interview sang Bombo Radyo Koronadal. Suno kay Maravilla, magatipon sila para sa ika-16 nga anibersaryo sang Ampatuan Maguindanao Massacre agud ipanawagan ang padayon nga hustisya para sa iya tatay kag sa iban pa nga biktima.
Dugang niya, masakit para sa ila nga makita ang mga gin-aalegar nga imbolbado sa krimen nga nagahilway kag nakahimo sang mga selebrasyon, mga butang nga indi na mahimo sang mga biktima upod ang ila pamilya.
Nagpanawagan liwat si Maravilla sa Marcos Administration nga indi sila pagkalimtan kag padayon nga pangitaon ang paagi agud maangkon ang hustisya para sa mga biktima nga padayon nga ginapakigbato sang mga pamilya sang nasambit nga massacre.
