KORONADAL CITY – Indi malaragway ang kalipay kag pagpasalamat sang amay ni Kent Meyler Malones Samaranos ang nagpanguna sa Electrical Engineering Board Exam 2017 sa achievement sang iya nga bata.
Sa eksklusibo nga interbyu sang Bombo Radyo Koronadal kay Mr. Euler Samaranos, ginpangabudlayan sini sa pagpaeskwela si Kent kag 4 pa ka mga utod sini paagi sa pagpanguma.
Suno kay Mr. Samaranos, dako nga dungog sa ila nga pamilya ang naangkon ni Kent nga wala nila ginalauman.
Ginpahayag pa sini nga wala nila ginhingyo kay Kent nga mag-top sa nasambit nga exam bangud luyag lamang suno pa nila nga makapasar ini.
Apang, sa ginhatag nga dungog sang iya nga bata lubos nila ini nga ginakalipay kag ginapasalamatan sa Diyos.
Nahibaluan nga humalin pa sang elementarya, nagpakita na sang kaalam si Kent bangud kalakip ini sa mga honorole tubtob mag-sekondarya sa Koronadal National Comprehensive High School sa siyudad sang Koronadal.
Ginpabugal man ni Mr. Samaranos nga nag-gradwar nga Cumlaude sa Mindanao State University (MSU) General Santos City campus ang iya nga bata.
Nahibaluan nga nagpanguna si Kent sa masobra 2mil ka mga nagkuha sang Electrical Engineering Exam sang Abril 25, 2017 makaligad nga makakuha ini sang 90.90 porsiyento.
