Dako ang epekto sa pangabuhi sang mga PUV driver ang padayon nga pagsaka sang presyo sang gatong, ilabi na sa adlaw-adlaw nga gastusan para sa pamilya kag pagpaeskwela sang kabataan.
Sa interview sang Bombo Radyo Koronadal, ginpahayag ni Aeron Rodero, isa ka Public Utility Vehicle driver, nga mabug-at para sa ila subong ang kahimtangan, labi na sa iya nga may ginapaeskwela nga duha ka kabataan sa kolehiyo.
Ginpabutyag niya nga bangud sini, ang normal nga madamo niya nga biyahe ukon “torno” sang una nagakabuhin na lamang subong sa isa tubtob tatlo ka biyahe kada adlaw.
Bangud sini, nagadyutay man ang ila kita samtang nagapabilin nga wala pagsaka sa pamasahe sang mga pasahero.
Bisan pa sang sitwasyon, nagalaum si Rodero kag ang iban pa nga PUV drivers sa ginasaad nga fuel subsidy halin sa gobyerno nga suno sa iya, dako nga bulig agud mahagan-hagan ang palas-anon sang mga driver kag mas mapadayon ang ila pangabuhian sa dalanon.
