KORONADAL CITY – Hugot nga ginakondenar sang Local Government Unit (LGU) Isulan sa pagpanguna ni acting Mayor Arnold Armada ang pagpatay kay Laguilayan Barangay Chairman Amado Serra Jr.
Suno kay Mayor Armada indi makatarungan ang ginhimo sa nasambit nga barangay official.
Kaangot sini, ginmandu sang alkalde sa mga otoridad nga magtipon sang mabakod nga mga ebedensiya agud nga madakpan ang nagpatay sa opisyal agud nga mahatagan ini sang hustisya.
Kadungan sini, nagapanawagan man ini sa publiko nga magbulig sa mga otoridad agud nga ipabilin ang rule of law kag potehiran ang kaluwasan kag dignidad sang ila nga komunidad.
Madumduman nga ang 64-anyos nga si Serra ang ginluthang-patay sang riding-tandem suspects samtang sakay sang salakyan sini kag magabakal lamang kuntani sang isda.
Ginalauman naman nga makabulig sang dako sa mga otoridad ang CCTV footage ilabi na sa pagkilala sa mga suspek.
