KORONADAL CITY – Gintawag nga propaganda lamang sang mga rebelde nga NPA ang ginhimo nga paghilway kahapon sa duha ka mga suldado sang 39th IB Philippine Army nga ginbihag nila sang Pebrero 2 sa Barangay Telafas, Columbio, Sultan Kudarat.
Ini ang ginpahayag ni Lt. Col. Harold Argamosa, ang batallion commander sang 39th IB Philippine Army sa interbyu sang Bombo Radyo Koronadal.
Suno sa opisyal, hugot nga pressure ang nagduso sa NPA agud nga hilwayon sanday Sgt. Sulaiman Calocop kag PFC Samuel Garay.
Wala suno pa sila sang may ginpatigayon nga offensive military operations agud nga mahilway ang mga suldado.
Sa pihak sini, dako man ang pagpasalamat ni Argamosa sa mga pumuluyo kag nagkalain-lain nga sektor nga nagbulig agud nga mahilway ang duha ka mga suldado.
Ginpasiguro man sini nga makabalik sa serbisyo ang mga ginhilway nga suldado makaligad nga mapaidalom sa nagakaigo nga proseso.
