Pagapatigayonon subong nga adlaw, Marso 12, 2026, sang alas 3:30 sang hapon sang Office of Civil Defense (OCD) ang Nationwide Simultaneous Earthquake Drill (NSED) sa bug-os nga pungsod.
Suno kay Junie Castillo, tagapamaba sang OCD sa panayam sang Bombo Radyo, ginatuyo sang aktibidad nga maensayo ang publiko sa husto nga dapat himuon kon may linog, partikular ang “duck, cover, and hold.”
Sa sini nga okasyon, ginpabug-atan man ang importansya sang continuity plans para sa pamilya, negosyo kag mga opisina agud masiguro ang padayon nga operasyon pagkatapos sang kalamidad.
Ang ceremonial pressing of the button pagahimuon sa Quezon City, samtang ang rehiyonal nga seremonya pagaidaraos sa Aklan bilang host province.
Magapakigbahin sa sabayang ensayo ang mga lokal nga panguluhan, mga eskwelahan, pribado nga sektor kag nagkalain-lain nga ahensya sang gobyerno.
Ginapaabot nga makabulig ang drill agud mangin mas handa ang tagsa ka Pilipino sa posible nga kalamidad, labi na kay kamakailan lang nagtala ang Philippine Institute of Volcanology and Seismology (PHIVOLCS) sang pila ka makusog nga linog sa Luzon, Visayas kag Mindanao sang nagligad nga tuig.
Ang sabayang ensayo subong nga adlaw isa ka pagpahanumdom nga ang kahandaan kag maayong koordinasyon sang tagsa ka sektor amo ang yabi agud mapakunhod ang kadaut kag masalbar ang kabuhi sa tion sang kalamidad.
