KORONADAL CITY – Para indi mabudlayan ang mga couple ukon mag-asawa sa Pilipinas kinahanglan nga hatagan man sang konsiderasyon ang divorce agud makita sang mag-asawa nga mahimo pa sila nga magbag-o kag makapangita sang lain nga pares.
Ini ang nangin pahayag ni Mr. Adrian Pete Pregonir, isa ka estudyante sa interview sang bombo Radyo Koronadal.
Reaksiyon ini ni Pregonir, makaligad nga gin-aprubahan sang House of Representatives Committee on Population and Family Relations “in principle” ang walo ka mga hagna nga gin-file nga nagaduso sang divorce law sa Pilipinas.
Naghilisugot man ang iban nga mga mamalidha sa motion ni Rep. Edcel Lagman nga aprubahan ang walo ka hagna nga amo nga iga-consolidate kag himuon nga substitute bill paagi sa tukuron nga technical working group.
Kadungan sini ginpahangop pa ni Lagman nga magluwas sa Vatican, ang Pilipinas lamang ang nagapabilin nga pungsod nga wala naga-legalize sang absolute divorce.
Ang divorce lang suno sa mamalidha ang makabulig sa mga mag-asawa nga na-ipit sa toxic ukon wala naga-function nga relasyon.
Sa amo nga deliberasyon,yara man ang tiglawas sang grupo nga “Divorce for the Philippines Now” nga nagpahayag nga dapat accessible ang diborsyo sa tanan nga couples ilabi na sa mga biktima sang pagpang-abuso kag abandonment.
Madumduman nga sa pinakabag-o nga survey, naguwa nga 50% sang populasyon sa pungsod pabor nga himuon nga legal ang diborsyo.
