KORONADAL CITY – Ginpasiguro ni DILG Secretary Mike Sueno nga madamo sang pagbag-o ang “Oplan Tokhang” nga liwat nga ginpatuman subong nga adlaw sang Philippine National Police (PNP).
Sa interbyu sang Bombo Radyo Koronadal kay Secretary Sueno, ginpahayag sini nga indi dapat mabalaka ang mga pumuluyo bangud pagasiguruhon sang PNP nga indi makapalain sa operasyon ang mga police scalawags bangud una na sila nga na-identify sa ginpatigayon nga internal cleasing sang PNP.
Suno pa kay Sueno sa liwat nga pag-upod sang PNP sa operasyon batuk sa illegal nga droga may dako nga papel ang kada chief of police sang police station bangud sa tion nga may reklamo o hitabo nga indi maayo, igareport sa PNP headquarters kag ang COP amo ang manabat.
Ginaawhag man sini ang tanan nga mga local officials nga makigbahin sa liwat nga pagpatuman sang new version sang Oplan Tokhang.
