Palpak suno pa ang operasyon sang mga katapo sang PNP sa bahin sang KOJC Compound bangud wala gid makita sang mga ini si Kingdom of Jesus Christ (KOJC) leader Pastor Apollo Quiboloy kag wala man suno pa nakita sang otoridad kun wala pa ini bulontaryo nga nagsungka.
Ini ang nangin pahayag ni Jeffrey “Ka Eric” Celiz- Secretary General sang SAMBAYANAN sa interview sang Bombo Radyo Koronadal.
Suno sa iya, maathag nga wala magsaler kag nagpalpak ang PNP sa ila nga operasyon bangud sa madugay nga tion nga pinangitaay sang mga ini sa ila nga target.
Una na nga gin insister ni PNP spokesperson Col. Jean Fajardo nga “joint effort” ukon pagbinuligay sang Armed Forces of the Philippines (AFP) kag Philippine National Police (PNP), ang pagpakita ni Kingdom of Jesus Christ (KOJC) leader Pastor Apollo Quiboloy, gikan sa isa ka “hideout” sa KOJC compound.
Nahibaluan, ginpakita na si Quiboloy sa publiko apang halos wala sang makita sa nawong sang Pastor.
Magluwas kay Quiboloy, ginpresentar man sa publiko ang iban pa nga kaupod sini nga nagapangatubang sang kaso.
Suno kay Fajardo, nag surrender si Quiboloy matapos nga naghatag sang ultimatum nga 24 oras ang kapulisan antis nga sudlon ang “hideout” sang pastor.
Matandaan, kalakip sa mga kaso nga ginapangatubang ni Quiboloy amu ang paglapas sa Special Protection of Children Against Abuse, Exploitation and Discrimination Act, kag qualified human trafficking.
