Apisar malayo na sa lugar ang mga pasilidad ukon imprastractura nga gina-bomba, padayon sa gihapon nga nagahalong ang mga OFWs sa Qatar.
Sa exclusive interview sang Bombo Radyo Koronadal kay Leizel Gullos, Bombo International News Correspondent to Qatar, mas mabatyagan nila nga safe ukon luwas na sila subong kumparar sa mga una nga semana sang pagbomba sang mga pungsod nga imbolbado sa kinagamo.
Samtang, ginpahayag man ni Gullos nga kun maglala pa ang sitwasyon sa rehiyon, may posibilidad nga mapilitan siya kag pila ka mga OFWs nga magpauli sa Pilipinas.
Bangud sini, nagpanawagan si Gullos sa gobyerno sang Pilipinas nga maghatag sang mas dako nga suporta ilabi na sa pinansyal nga aspeto sa mga OFWs sa Qatar, bangud sa nagataas ang presyo sang mga balaklon kag sa epekto sang padayon nga kinagamo sa rehiyon.
Samtang nagpanawagan man siya sa kasubong niya nga OFW nga magbilin nga mainampuon kag magsalig lang sa Mahal nga Makaako sa tunga sang padayon nga tensyon sa Middle East.
