Nagdangat na sa 920 ang numero sang mga nautasan kag 3,360 naman ang napilasan matapos ang duha ka mabaskog nga linog nga nagtupa sa Venezuela, suno sa gobyerno.
Nagapadayon ang search and rescue operations samtang ginapangita pa ang madamo nga missing.
Samtang, padayon naman nga ginabulong ang mga pilason sa temporaryo nga pasilidad matapos maguba ang madamo nga building sa aminhan nga bahin sang pungsod, lakip ang kapital nga Caracas.
Ang ikaduha nga linog nga may kusog nga magnitude 7.5 amo ang isa sa pinakamabaskog nga pag-uyog nga natabo sa Venezuela sa sulod sang isa ka siglo.
Pinakagrabe nga naapektuhan ang La Guaira, kun sa diin madamo nga mga building ang naguba.
Yara man sa lugar ang isa sa panguna nga pantalan kag internasyonal nga airport sang pungsod.
Suno sa mga otoridad, may yara pa sang mga tawo nga ginapangita kag posible pa nga magsaka ang numero sang mga napatay samtang nagapadayon ang operasyon sa pagluwas.
Nag-abot na man ang mga international rescue teams agud magbulig.
Ginatos nga mga building kag iban pa nga imprastraktura ang naapektuhan, lakip ang pila ka ospital kag shopping centers.
