KORONADAL CITY – Napata yang is aka ginapatihan notoryos nga motornapper matapos magbato sa mga otoridad sa isa ka comelec checkpoint sa Lambayong,Sultan Kudarat.
Ginkilala sang Lambayong PNP ang napatay nga suspek nga si Kautin Esmael, yara sa legal nga edad kag residente sang nasambit nga banwa.
Una diri, gintayaan sang armas sang suspek si Richard Cerbales kag gindala ang motorsiklo sini.
Rason nga nagpalapit si Cerbales sa Lambayong Municipal Police Station kag nagpatigayon sang operasyon ang mga otoridad batuk sa suspek tubtob nga nakit-an ini sa National Highway ,Barangay Didtaras kun diin may ginbutang nga Joint Comelec Checkpoint sang kapulisan kag Sultan Kudarat Highway Patrol Group.
Gilayon nga ginpapundo sang mga pulis ang suspek apang sa baylo nga magsunod ini, ginpadasigan niya pa ang pagpadalagan sang ginamaneho nga motorsiklo rason nga ginlagas ini sang kapulisan.
Pag-abot sang suspek sa Purok Pag-asa, ginpalukpan sini ang mga pulis usar ang kaugalingon nga armas rason nga nagbalos ang mga pulis tubtob nga naigo ini.
Nadala pa sa hospital ang suspek apang gindeklarar nga dead on arrival sang doctor.
Narekober sa crime scene ang 2 fired cartridge case sang caliber 5.56mm, 3 ka fired cartridge case sang caliber 9mm, 1 sling bag nga may unod nga dried marijuana leaves, 1 unit caliber 45 pistol,1 steel magazine ,3 live ammunition sang caliber 45 pistol kag 1 motorsiklo.
Nahibaluan nga ang suspek ang involbado man sa illegal drug activities sa nasambit nga banwa.
