KORONADAL CITY – Naka-full alert status sa subong ang bug-os nga probinsiya sang North Cotabato matapos ang nagluntad nga pagsigabong sa ticketing booth kilid sang national highway, Brgy. Sibsib, Tulunan, North Cotabato alas-12:30 kahapon sang hapon nga nagresulta sa pagkapatay sang isa ka fruit vendor kag pagkapilas naman sang 7 ka iban pa.
Ini ang ginkumpirmar ni Police Lt. April Rose Soria, tagpamaba sang North Cotabato PNP sa interbyu sang Bombo Radyo Koronadal.
Suno kay Soria, padayo pa nga ginahibalo ang sahi sang bomba nga nagsigabong kag ang mga indibidwal ukon grupo nga responsable sa insidente.
Kaangot sini, ginpatuman man ang intensified nga checkpoint sa mga entry kag exit points sang probinsiya.
Nagapanawagan man ang opisyal sa mga pumuluyo nga makig-angot sa ila kag ipahibalo ang anuman nga makit-an nga mga tawo ukon butang nga makaduluda.
Madumduman nga isa ang ginbawian sang kabuhi samtang 7 naman ang pilason matapos maigo ang isa ka unit sang Yellow Bus Lines Incorporated.
