KORONADAL CITY – Extortion ukon pagpanghadlok ang ginalantaw nga motibo sang Pikit PNP sa pagpanghaboy sang granada sang mga suspek nga ginkapilas sang duha ka tawo.
Sa interbyu sang Bombo Radyo Koronadal kay PSupt. Bernard Tayong, tagpamaba sang Cotabato Police Provincial Office, nagluntad ang insidente takna alas alas-6:50 kagab-i kun sa diin ginkilala ang mga biktima nga sanday Kim John Tañada, isa ka negosyante kag security guard nga si Christopher Montecino, lunsay mga residente sang Brgy. Poblacion.
Base sa imbestigasyon, target suno pa sang mga suspek nga sakay sang motorsiklo ang municipal treasurer nga si Ariel Cabañog kag nadalahig ang duha ka biktima.
Gilayon nga nagpalagyo ang mga suspek padulong sa hilit nga lugar sang Barangay Ladtingan.
Sa subong nagapaayo sa Kidapawan Medical Specialist Center sa Kidapawan City ang mga biktima samtang ginahibalo sang mga otoridad ang identity sang mga suspek.
