KORONADAL CITY- Emosyonal nga nagpasalamat si Al-Hakam Reggie Dimalanas, ang 23-anyos nga Maguindanawon gikan sa Buluan, Maguindanao nga ginkoronahan bilang Mr. Culture World 2017 sa pagbisita sini sa Bombo Radyo Koronadal.
Sa interbyu sang Bombo Radyo sa iya, nagpahayag ini sang kalipay sa suporta nga ginhatag sa iya ilabi na sa mga taga-Mindanao sa pagpartisipar sini sa prestihiyoso nga kompetisyon kun diin yara sa 30 ang mga nangin kasumpong sini nagikan pa sa nagkalain-lain nga bahin sang kalibutan.
Suno kay Dimalanas, ginahalad niya ang kadalag-an sa mga kababayan sa Autonomous Region in Muslim Mindanao labi na sa mga biktima sang Marawi siege nga naka-eksperiensiya sang kabudlay.
Dugang pa sini nga pagausaron niya ang titulo agud nga manawagan sa bug-os nga kalibutan agud makatipon sang pondo para mabuligan ang mga kababayan nga naipit sa giyera kun diin natalana man ini nga magbisita sa Marawi City sa madason nga adlaw antes nga magtulak sa Indonesia para sa pagsugod sang iya nga career.
Samtang, isa ka dako nga dungog man para sa iya nga makapadulong sa istasyon sang Bombo Radyo nga iya ginapamatian gikan pa sang bata ini sa ARMM kun diin game man ini sa pag-extro sang “Basta Radyo… Bombo”.
