Nagapadayon ang imbestigasyon sang mga otoridad sa pagpangluthang patay sa isa ka lalaki sa Maguindanao del Sur.
Ginkilala ang biktima nga si Jay-ar Palabrica, 25 anyos kag residente sang Koronadal City, South Cotabato.
Sandig sa report sang mga otoridad, nasapwan na lamang nga wala na sang kabuhi ang biktima samtang duguon sa higad sang dalan sa Barangay Gaunan, Rajah Buayan sa nasambit nga banwa.
Una nga naguwa ang report nga posible biktima sang motornapping si Palabrica apang nasapwan man ang ginamaneho nga motorsiklo sini.
Nahibaluan nga samtang ginamaneho ni Palabrica ang motorsiklo sini ginsundan siya sang riding-in-tandem suspect kag ginluthang sa pila ka parte sang iya nga lawas.
Sa karon, ginahibalo pa ang armas nga gingamit sa pagpatay sa biktima kag ang motibo sang krimen.
Wala pa man sang ihibalo ang mga otoridad sa kun ano ang identity sang mga suspek.
Nahibaluan nga may asawa na ang biktima kag bulan pa lamang nga bata.
Nagaapela naman sang madasig nga imbestigasyon ang pamilya sini kag agud nga mahatagan man sang hustisya ang biktima.
