KORONADAL CITY – Magasugod na karon sa gab-i ang moon sightings sang mga IMAM, ULAMA kag religious leaders sang Islam agud madeterminar ang ang opisyal nga pagtakop sang Ramadan ukon isa ka bulan nga pagpuasa sang mga Muslim sa bug-os nga kalibutan.
Ini ang ginpahayag ni South Cotabato Chief of Muslim Affairs Sultan Mutalib Sambutu sa interbyu sang Bombo Radyo Koronadal.
Suno kay Sambuto, tanan sila ang nagapreparar agud bantayan ang bulan karon sa gab-i kag sa tion nga magpakita ini, dululungan sila nga magasambayang ukon magapangamuyo kay Allah.
Dugang pa ni Sambuto nga ang pagpakita sang bulan ang tanda sang pagtakop sang isa ka bulan nila nga pagsakripisyo.
Apang, sa tion nga indi makita ang bulan karon sa gab-i, opisyal sa gihapon nga igaselebrar ang Eid’l Fitr sa Lunes.
Samtang, indi naman matigayon ang ginalauman nga “congregational prayer” sang mga Muslim sa South Cotabato sa selebrasyon sang Eid’l Fitr bangud sa ginapatuman nga curfew kag sa padayon nga Martial Law.
Ang ginatawag nga congregational prayer ang pagtililipon kuntani sang tanan nga mga Muslim sa mga mosque agud nga dululungan nga magpangamuyo, magpasalamat kag magselebrar.
Apang bangud sa wala pa matapos ang problema sa Marawi kag mga pamahog sang terorismo magapangamuyo na lamang sila upod ang tagsa nila ka pamilya.
Apisar nga indi makapadulong sa mosque, magapangita na lamang sila sang malimpyo kag malinong nga lugar agud makapangamuyo.
Kadungan sini, pagahingyuon nila kay Allah ang kalinong sa Mindanao kag kaluwasan sang mga utod nila nga naipit sa gihapon sa nagapayon nga Marawi crisis.
