Ginapatihan sang Philippine Coast Guard (PCG) nga ang tikang sang China nga ipadala ang ila “monster ship” sa exclusive economic zone sang Pilipinas ang nagatuyo nga mahadlok ukon matahap ang mga manugpangisda nga Pinoy.
Suno kay PCG Commodore Jay Tarriela, Coast Guard spokesperson for the West Philippine Sea, luyag man sang China Coast Guard nga mangin lehitimo ang ila presensya sa bisinidad sang Bajo de Masinloc. Paagi sini, nagapati ang pihak nga kampo nga mapahog nila ang Filipino fishermen kag indi na sila magkadto sa amo nga area.
Una nga na-detect ang amo nga barko sa kalayuon nga 54 nautical miles halin sa baybayon sang Zambales.
Nagpadala ang PCG sang BRP Cabra kag aircraft para mapunggan kag ma-monitor ang Chinese vessel.
Sang nakumpirma nga yara gid man sa Bajo de Masinloc ang Chinese Coast Guard vessel number 5901 alas singko sang hapon sang Sabado, ginradyuhan ini agud tabugon halin sa kadagatan sang Pilipinas.
Tubtub subong, yara pa ini sa exclusive economic zone sang Pilipinas kag didto man nagabantay ang BRP Cabra sang PCG.
Sang Hunyo, nagkadto man ini nga monster ship malapit sa BRP Sierra Madre sa Ayungin Shoal sa West Philippine Sea.
Ang Chinese monster ship nagabig-at sang 12,000 tonelada kag amo ang ginakabig nga pinakadaku nga coast guard ship sa bilog nga kalibutan. Lima ka pilo ang kadakuon sini sa BRP Teresa Magbanua kag Melchora Aquino nga amo ang pinakadaku nga ginapanag-iyahan sang PCG.
