Nagapangayo sa subong sang materyales agud nga mausar sa liwat nga pagpatukod sang ila nga puluy-an ang mga residente nga naapektuhan sang sunog nga nagluntad sang Agosto 17, 2026 sa bahin sang Purok New Leganes, Brgy. Zone I, Koronadal City. Sa interview sang Bombo Radyo Koronadal kay Tatay Arthur Pabilon- isa sa mga nasunogan sang puluy-a temporaryo sila sa subong nga naga dayon sa puluy-an sang iya nga kumpare bangud naabo ang ila nga puluy-an bangud sa sunog.
Ginpahayag man sini nga nagpaligad sila sang gab-e sa ila nga kumpare bangud wala gid sang may nasalbar nga nga pagkabutang ang ila nga pamilya. Suno sa iya, nakabati lang sila nga isa ka lupok malapit sa ila nga lugar antes naglapta ang aso kag naglapta ang kalayo sa ila nga mga kabalayan. Madasig naman suno pa nga naga saylo ang kalayo sa nagkalain-lain nga puluy-an bangud kasagaran sa mga materyales sang mga puluy-an himo sa light materials.
Isa man sa mga problema nga nakita sang ila nga pamilya amu ang indi masulod sang bombero ang ila nga lugar kag kinahanglan pa butungon sang mga ini ang hose agud nga maigo sang tubig ang ila nga puluy-an. Naga panawagan naman ang ila nga pamilya kag tanan nga mga apektado nga mga residente nga kinahanglan nila sang makaun, masuksok nga mga panapton kag mga materyales sa pagtukod liwat sang ila nga puluy-an. Naga padayon naman sa subong ang imbestigasyon sang mga katapo sang Bureau of Fire Protection Koronadal sa nangin tunaan sang sunog.
