KORONADAL CITY- Hugot gid nga ginapahanumduman sang Police Reigonal Office 12 ang tanan nga mga botante nga likawan ang pag dala sang mga butang nga ginadumilian gid sa sulod sang polling kag voting places sa diin man sang lugar sa sulod sang Rehiyon.
Ini ang ginhatagan sang ligwa ni PLtCol. Ma. Joyce Birrey , Spokesperson sang PRO-12 sa interview sang Bombo Radyo Koronadal.
Suno sa iya, dapat gid sa gihapon nga tandaan sang mga botante nga bawal gid nga magdala sang mga patalom kag mga armas-luthang para malikawan ang pagsaka sang tension kag ginamo sa sulod sang lugar nga gina botohan labi na sa mga eskwelahan.
Dugang pa sini, epektibo naman sa subong tubtub bwas ang ginapatuman sang PNP nga “liqour ban” ukon pagbaligya sang mga makahulubog nga ilimnon para sa mga tindahan kag lakip naman ang pag- inom sini.
Naga kaangay man nga tandaan ang pag obserbar sang minimum health standard protocols bangud naga pangatubang pa sa gihapon ang bilog nga kalibutan sa pamahog sang Covid-19.
Suno pa sa opisyal, may mga nakatalana naman nga mga special kag priority lanes nga itigana sa mga botante nga senior citizens, Persons with Disability kag mga buntis.
