KORONADAL CITY – Nakaalerto kag padayon nga gina-monitor sang DMW Region 12 ang kahimtangan sang aton mga Overseas Filipino Workers (OFWs) sa tunga sang nagalala nga tensyon sa Middle East.
Sa interview sang Bombo Radyo Koronadal kay Regional Director Samsudin T. Lintongan, ginkumpirma sini nga nagalab-ot na sa kwarenta’y dos (42) ka mga OFW halin sa rehiyon dose ang pormal na nga naghingyo sang repatriation ukon pagpapuli diri sa Pilipinas.
Sa subong, ginabanta nga nagalab-ot sa Disinueve mil (19,000) ang numero sang mga OFW halin sa South Cotabato, samtang sobra naman sa kinse mil (15,000) ang kabilugan nga numero sang mga taga-Region 12 nga yara sa Middle East.
Suno kay Director Lintongan, apisar nga napaidalom sa no-fly zone ang pila ka bahin sang Middle East kag wala sang may makalupad nga eroplano, ginpasiguro sini nga sa oras nga magtinawo ang tensyon, gilayon nga ipatuman ang pagpang-evacuate.
Ginlaygayan man ang mga OFW nga yara sa guwa sang pungsod nga magpalapit sa Migrant Workers Office (MWO) ukon Philippine Labor Office para sa on-site assistance.
Samtang, nanawagan ang DMW sa mga pamilya sang mga OFW diri sa probinsya nga indi magduha-duha sa pagkadto sa ila opisina sa Region 12 agud mahatagan sang nagakaigo nga bulig kag impormasyon tuhoy sa ila mga himata.
Luwas sa repatriation, nakahanda man ang reintegration assistance para sa mga nagapauli nga OFW agud mangin tayuyon ang ila transisyon pabalik sa pungsod.
Sa karon, ginahulat pa ang pinal nga data halin sa Central Office may kaangtanan sa mga taga-rehiyon nga na-stranded sa mga airport kapareho sang sa Dubai.
