Nagtipon sa isa ka video call nga gintiguluhan nga “assembling for democracy” ang mga Marvel Stars agud nga magpabutyag sang ila pagsuporta sa kandidatura ni Kamala Harris sa US presidential polls.
Ang pagtilipon, ginpangunahan ni “Avengers” star nga si Robert Downey Jr.
Gin-post ni Downey ang ila video call sa iya Instagram account kag ginaganyat sini ang publiko nga pilion si Harris bilang masunod nga US president.
Ang video, una nagbukas sa Marvel actress nga si Scarlett Johansson kaupod ang ila mga “fellow Avengers” stars nanday Mark Ruffalo, Don Cheadle, Paul Bettany, Danao Gurira, kag Chris Evans.
Gin-istoryahan sang grupo kon paano sila makabulig sa kampanya sang presidential hopeful kag Democratic Vice President.
Sa ulihi, nagpaindis-indis ang mga aktor sa pagpaminsar sang manami nga tagline para kay Harris kag naggwa kay Gurira ang Wakanda battle cry ukon sikat nga Black Panther motto nga “Kamala Forevah”.
May kaangtanan sini, gin-share man ni Mark Ruffalo ang video sa Twitter.
Madumduman nga si Harris, upod kay Minnesota Gov. Tim Walz ang nagatinguha nga makuha ang duha ka pinakamataas nga posisyon sa Estado Unidos batok sa kay anay US President Donald Trump kag iya running mate nga si Senator JD Vance.
