KORONADAL CITY – Tuman ang kasubo sang pamilya sang isa sa ginakabig nga mga survivors sang nagluntad nga Marawi siege sadtong tuig 2017 makaligad ini nga nagtaliwan.
Base sa Facebook post ni Boyet Suganob, nagtaliwan bangud sa atake sa kurason ang iya utod nga si Fr. Teresito “Chito” Suganob.
Apesar nga wala pa nagpaguwa sang anuman nga detalye ang pamilya sa natabo, apang sa subong nagapangayo pa sila sang privacy angot sa pagkapatay ni Fr. Chito.
Nagserbe ini bilang pari sa Prelature of Marawi, kag nangin Vicar General of Marawi, bilang tuo nga kamot ni Marawi Bishop Edwin dela Peña.
Sang nag-ibwal ang pag-atake sang ISIL-linked Maute kag Abu Sayyaf group sa nasambit nga siyudad sadtong Mayo 23, 2017 , kalakip si Fr. Chito sa 23 nga mga ginhostage sang Maute kag ginapanawagan ang pag-isol sang mga suldado sa nasambit nga lugar, base sa nangin demanda sang mga terorista.
Makaligad ini nga naluwas, temporaryo anay ini nga nagpahuway kag nagbalik sa iya serbisyo bilang pari tubtob sa ulihi nga mga tinion.
