KORONADAL CITY- Hugot nga ginpanginwala sang Land Transportation Office 12 nga isa ka lehitimo nga enforcer sang LTO ang nasakpan nga nagapangotong sa siyudad sang Tacurong.
Sa interbyu sang Bombo Radyo Koronadal kay Director Macario Gonzaga, isa ka fixer kag indi enforcer si Mohamad Palakasi Mangudadatu, 28 anyos may asawa kag residente sang Buluan Maguindanao.
Suno sa iya, luyag niya nga mahatagan sang kaathagan ang nasambit nga impormasyon baliskad naman sa pahayag sang Tacurong City PNP nga enforcer ini sang LTO Tacurong.
Suno pa kay Gonzaga indi nila pagpabay-an ang pag-angkon sang mga kotong enforcers sa LTO 12.
Kadungan sini, nagpanawagan si Gonzaga sa mga motorista nga maghalong sa mga fixers kag nagapakilala nga mga enforcers sang LTO samtang nagpasalamat naman ang opisyal nga nadakpan ang suspek.
Kun madumduman, nadakpan sa isa ka entrapment operation si Mangudadatu matapos nga magbaton sang P1,500 kabaylo sang impounded nga motorsiklo.
