KORONADAL CITY – Ginkumpirmar mismo ni Polomolok Mayor Honey Lumayag-Matti nga nakapagkit na sila sang kaso sang local transmission sang covid-19 sa ila banwa.
Ini makaligad nagdugang sa listahan ang walo nga kumpirmado nga kaso kun sa diin apat sa mga ini ang may yara sang co-morbidity ukon may iban nga balatian ukon komplikasyon.
Sa interbyu sang Bombo Radyo Koronadal kay Mayor Matti, magluwas sa local transmission, nangin hugot ang pagpatuman sang ila local government unit sa mga pagsulondan sang ginpaguwa sini nga executive order 37.
Gin-ako man sini nga amat-amat na nga paubos ang ila pondo kag suplay bangud sa nakaligad nga pagpaidalom man sa lockdown kag mga relief efforts, apang ginatilawan ini nga i-maximize agud mabuligan ang mga barangay nga ginpaidalom sa localized lockdown.
Sa pihak nga bahin wala pa sila sang plano nga ibatak sa general community quarantine ang banwa, kag sa baylo ila lamang nga pahugtan ang mga protocols nga nalakip sa ginpaguwa nga executive order.
