KORONADAL CITY – Nasapwan nga wala na sang kabuhi ang isa ka ginapatihan bag-o bun-ag nga lapsag sa guwa sang gate sang isa ka puluy-an sa block 3, Diaz, Barangay Zone 3, Koronadal City.
Sa interview sang Bombo Radyo Koronadal kay Ginang Linda Torento,nakakita sang lapsag, alas-2:30 kaina sang hapon sang may nagbakal sa iya tindahan nga isa ka lalaki nga yara sa 40 ang edad kag amo ang nagsugid nga may yara sang lapsag nga ginataban sang ido.
Suno kay Ginang Torento, gilayon siya nga naguwa sa tindahan kag ginkadtuan ang ginasiling sang lalaki kag didto nakita sini ang lapsag nga wala na sang kabui, duguon kag wala na ang iban nga parte sang lawas sini.
Nangayo ini sang bulig sa mga kaingod kag nagtawag sang mga opisyal sang barangay agud makuha ang lapsag.
Natingala man si Ginang Torento nga nadula na lamang ang lalaki nga nagsugid sa iya angot sa lapsag.
Ginkuha na sang City Health Office ang lapsag kag natalana nga hatagan sang maayo nga lubong.
Nagapadayon man ang imbestigasyon kun sa diin naghalin ang lapsag kag kun sin-o ang responsable sa paghaboy sa iya.
Sa tion nga mahibaluan ang mga ginikanan sang lapsag magapangatubang sang nagakaigo nga kaso ang mga ini.
