KORONADAL CITY – Hugot nga ginakondenar ni Lambayong Mayor Andy Agduma ang pag-ambush-patay kay anay Sultan Kudarat vice governor Rolando Recinto makaligad ini nga ginluthang sang ginapatihan nga riding in tandem suspects.
Madumdoman nga naghalin ini sa siyudad sang Tacurong sakay sang iya L-200 truck kag ginluthang ini sa bahin sang Brgy. Bulimen.
Suno sa alkalde nga tiyo ang nasambit nga biktima, masakit sa iya buot labi na sa bug-os nga banwa ang pagpatay sa nasambit nga opisyal.
Bangud diri, ginmando niya sa PNP kag AFP sa iya nasakupan nga pahugtan pa ang ginapatigayon nga seguridad kasunod sang natabo.
Dugang sang alkalde, magahatag man sila sang padya para sa sin-oman nga makatudlo sa mga suspek nga responsable sa pagpatay sa nasambit nga opisyal.
Nagaapela man ini sa publiko nga kuntani buligan sila agud masolusyonan ang kaso kag mahatagan sang hustisya ang pagkapatay ni Recinto.
Nahibaloan nga nagserbe man sadto bilang alkalde kag bise alkalde sa banwa sang Lambayong ang nasambit nga biktima.
