Imbes pasalamatan ukon pasidunggan ang lalaki nga naghimo sang taytay para sa kasulhayan sang mga pumuluyo sa ila lugar sa Zhenlin village , isa ka malayo kag maligwin nga lugar sa Jilin province, ini siya ang ginsilutan kag ginsentensyahan nga mapriso sang duha ka tuig.
Madugay na nga nagareklamo ang mga tawo nga mabudlay ang pagtabuk halin sa ila lugar pakadto sa pihak kon sa diin kinahanglan pa nila nga maglibot nga tuman ka awat kon magbiyahe, wala gid sila ginhatagan sang igtalupangod sang ila gobyerno.
Bangud sini napinsaran sang isa ka lalaki nga si Huang Deyi nga maghimo sang pontoon bridge patabuk sa suba para mangin masulhay kag indi na sila mabudlayan magkadto sa tabuk.
Ang nasambit nga taytay nga nahuman sa ginsugpon-sugpon nga mga bangka kag ginbutangan sang tapi sa ibabaw nga nagaserbe nga alagyan ang naghatag sang kalipay sa mga pumuluyo sa lugar bangud nasolbar ang ila problema nga magluwas nga nakakinot na sila, nangin madasig pa ang ila pagkadto sa tabuk.
Nahibaluan nga nagahatag sang gamay lamang nga kantidad ang mga tawo bilang bayad sa tagsa nila ka paglabay ikumparar kon magbiyahe pa sila sang malawig kag magbayad sang mahal sa pamasahe.
Kag agud maka-akomodar sang light vehicles kasubong sang motorsiklo kag biseklita ang nasambit nga taytay, gin-improve ini ni Deyi pinaagi sa paggamit sang mas mabakod nga materyales.
Apang makaligad ang pila ka tuig, natukiban sang Taonan Water Affairs ang ginhimo nga taytay ni Deyi kabangdanan ginmandu sini nga kakason ang taytay kag gin-akusahan si Deyi nga ilegal nga nagaganar diri.
Subongman, nagpakatig-a sila sa pagdismantle sang taytay kabangdanan ginkasuhan si Deyi kag nasentensyahan nga mapriso sang duha ka tuig nga nagresulta naman nga nagbalik sa mabudlay nga sitwasyon ang mga pumuluyo.
