KORONADAL CITY – Ginpasiguro ni Koronadal City Mayor Eliordo Ogena nga luwas kag masulhay ang pagpatuman sang contact tracing sang siyudad sang Koronadal angot sa covid-19 pandemic.
Sa interbyu sang Bombo Radyo Koronadal kay Mayor Ogena, mangin han-ay suno pa ang pagpatuman sang StaySafe.ph app nga responsable sa pag-trace sa mga tawo nga ginadudahan nga may mga sintomas sang covid-19, sandig sa ginpaguwa nga executive order no. 45.
Ang nasambit nga tikang ang accredited man sang Interagency Task Force, Department of Health, DILG, kag National Privacy Commission.
Suno kay Ogena, kinahanglan nga mahan-ay sang maayo ang privacy sang isa ka indibidwal ilabi na sa impormasyon sang isa ka persona agud magbayolar sa Data Privacy Act.
Kinahanglan man nga tumanon ang nagaeksister nga layi subong nga tio sang krisis, kag ini ang rason ngaa indi sila magatuman sa contact tracing application nga ginaduso sang South Cotabato provincial government.
Sa pihak nga bahin, ginhatagan punto sang alkalde nga indi kinahanglan nga kasubong sa totalitarian leadership ang dapat matabo may kaangtanan sa pagpatigayon sang contact tracing sa probinsya.
Ginhimo ni Mayor Ogena ang pahayag sang ginpangayoan sang reaksyon angot sa pagbutang suno pa sa surveillance sa katawhan pinaagi sa rapid household survey sang provincial government.
Ginpahayag sang alkalde sa interbyu sang Bombo Radyo nga kinahanglan lamang nga lantawon yadtong mga probable, suspect ukon mga kumpirmado nga kaso kag didto umpisahan ang pag-contact trace.
Ini bangud base sa joint memo circular sang DOH kag National Privacy Commission, mahimo lamang ipatigayon ang contact tracing pinaagi sa “guidance, authority, kag instruction” sang DOH.
Sang ginpangayoan sang iya reaksyon sa pahayag ni Gov. Reynaldo Tamayo Jr nga indi suno pa paglapas sa Data Privacy Act ang ila paagi sa pagcontact trace, ginpahayag lamang ni Mayor Ogena nga opinyon ini sang gobernador, apang nagproponer nga mas maayo nga lantawon ang layi agud makit-an ang mga legalidad.
