Ginapahanumdom sang Koronadal City Health Office ang publiko nga magpakonsulta lamang sa DOH-accredited Animal Bite Treatment Centers agud masiguro ang kalidad kag kaluwasan sang anti-rabies vaccines nga ginahatag.
Ini ang nangin pahayag ni Koronadal City Health Officer Dr. Vincent Ende, sa interview sang Bombo Radyo Koronadal, kasunod sang mga report sang peke ukon kwestyonable nga anti-rabies products nga posible makabutang sa peligro sa mga pasyente.
Suno kay Dr. Ende, importante nga siguruhon anay sang publiko kon accredited sang Department of Health ang animal bite treatment center antes magpa-injection ukon magpaidalom sa anti-rabies treatment.
Ginpahanumdom man niya nga indi dapat pagbalewalaon bisan ang magagmay nga kagat ukon kamras sang ido kag kuring bangud posible gihapon ini magdala sang risgo sang rabies.
Bisan pa nabakunahan na batok sa rabies ang sapat, ginapanugyan gihapon sa biktima nga magpakonsulta sa doktor kag magsunod sa health protocols.
Ginpabutyag ni Dr. Ende nga nagadugang na ang ihibalo sang publiko, ilabi na sang mga ginikanan, parte sa importansya sang gilayon nga pagpangayo sang bulig medikal.
Samtang, gin-awhag ang mga pet owner nga mangin responsable sa pag-atipan sang ila mga hinuptanan kag siguruhon nga regular ang ila pagbakuna batok sa rabies.
