KORONADAL CITY – Naglab-ot sa halos 100 ka mga myembro sang New Peoples Army ukon NPA ang nagbalik sa sabak sang gobyerno humalin sang 2013 tubtob 2019.
Ginpahayag ini ni Police Regional Office 12 Director, Brig. Gen. Alfred Corpuz.
Suno kay Corpuz, ang amat-amat nga pagsungka sang mga NPA ang rason kun ngaa nabuhinan ang impluwensya sang nasambit nga rebelde nga grupo.
Kadam-an man suno pa sa mga nagsungka bangud nakit-an sang mga ini ang bulig sang gobyerno sa mga anay nila kaupod nga una na nagsurrender.
Pamatuod lamang suno pa ini nga seryoso ang gobyerno nga mahatagan sang ika-2 nga higayon ang mga myembro sang rebelde nga grupo.
Sa karon, ginhatagan na ang mga NPA surrenderees sang livelihood kag financial assistance pinaagi sa Enhance Comprehensive Local Integration Program sang gobyerno.
