KORONADAL CITY – Ginalagas na sang mga otoridad ang suspek sa nagluntad nga pagpanglabo sa bahin sang T’Bayong, Brgy. Lamfugon, Lake Sebu, South Cotabato nga ginkapatay sang isa ka tawo kag ginkapilas sang isa pa.
Ginkilala ang napatay nga biktima nga si Roland Sulan Salaway, 34 anyos kag ang utod sini nga si Tuyong Sulan Salaway, 45 anyos kag lunsay residente sang nasambit nga lugar.
Base sa inisyal nga imbestigasyon sang Lake Sebu PNP, nag-inom-inom suno pa ang mga biktima kag ang suspek nga si Eric Sulan Salaway nga utod man sang mga biktima kun sa diin nakaangkon sang mainit nga baisanay ang mga ini.
Nagkuha sang binangon si Eric kag ginlabo ang mga biktima kun sa diin tuman nga naigo si Roland.
Gilayon nga gindangat sa South Cotabato Provincial Hospital ang mag-utod apang gindeklarar nga dead on arrival si Roland, samtang nagapaayo naman si Tuyong.
Sa subong nagapatigayon na sang hot pursuit operation ang Lake Sebu PNP makaligad ginhimo ang nasambit nga krimen.
