KORONADAL CITY – Patay ang isa ka ginakabig no.3 sa high value target list sang mga otoridad sa ginpatigayon nga operasyon batuk sa iligal nga droga sa siyudad sang Tacurong.
Ginkilala ang suspek nga si Romel Pagpangan, yara sa legal nga edad kag residente sang nasambit nga lugar.
Suno sa Tacurong City PNP, nadakpan sa akto nga nagapot session ang suspek kaupod ang 2 pa ka mga drug suspects sa mismo nga puluy-an sini.
Naghana pa nga magpalagyo ang suspek matapos nga magpalupok sa mga police operatives usar ang calibre 38 apang naigo ini sang bala.
Arestado naman ang 2 pa ka suspek nga sanday Aaron Gogo, 25, kag isa ka Pepe Pacinan 27, nga lunsay residente sang Prk. Islam Brgy. Griño Tacurong City.
Nakuha sa posisyon sang mga suspek ang indi pa madeterminar nga shabu kag nagkalain-lain nga drug paraphernalia.
Sa subong, ginapreparar na ang kaso nga ipasaka batuk sa mga naarestar nga suspek samtang gindala naman sa funeral parlor si Pagpangan.
