Kadungan sang ika-50 nga anibersaryo sang karakter nga si Hello Kitty, ginbuyagyag sang Sanrio Inc. ang matuod nga identity sang sikat nga karakter.
Sa Today Show, gin-athag ni Jill Koch, Senior Vice President sang Marketing kag Brand Management sang Sanrio Inc. nga apisar kaangay sang kuring ang nawong ni Hello Kitty, indi ini isa ka kuring kundi isa ka bata nga babaye.
Dugang pa niya, si Hello Kitty ang natawo kag nagdako sa isa ka residential nga lugar sa London gani bisan ginhimo sia sa Japan, isa ka British ang ini nga karakter.
Nanari-sari karon ang reaksyon sang mga fans ni Hello Kitty bangud nga madugay sila nga nagpati nga kuring ini bangud sa whiskers kag dulunggan sini nga kaangay sang kuring.
Si Hello Kitty ang isa sa mga karakter sang Sanrio kaupod sanday Cinnamoroll, Kuromi, My Melody kag madamo pa.
Ang Sanrio Inc. isa ka kumpaniya sa Japan nga nagahimo sang mga karakter kag produkto nga nagasentro sa bantog nga kultura sang mga hapon.
Ikaw, nagapati ka man bala nga indi kuring si Hello Kitty?
