KORONADAL CITY- Gina-ako sa gihapon ang pila sa mga himata sang mga napatay sa Maguindanao massacre nga padayon sa gihapon sila nga ginatanyagan sang dako nga balor sang kwarta agud nga bawion ang kaso nga ginsang-at ilabi na sa mga nagapanguna nga suspek halin sa Ampatuan clan.
Sa ekslusibo nga interbyu sang Bombo Radyo Koronadal kay Gng. Moneth Salaysay, asawa sang isa sa mga katapo sang media nga napatay sa Maguindanao massacre, minilyon nga kwarta ang ginatanyag halin sa kampo sang mga akusado kun sa diin tuman ang kaakig sang mga ini bangud sa pagpang insulto sa mga nabilin nga mga himata sang mga biktima.
Kun madumduman nga pinakamataas suno pa nga offer halin sa mga akusado agud nga mag-isol ang pamilya sang mga biktima sa kaso ang nagalab-ot sa P30 million kun sa diin suno kay Gng. Salaysay indi mabalik sang kwarta ang kabuhi sang iya nga bana kag sang mga biktima sang massacre nga padayon nga nagapanawagan sang hustisya kadungan sang ika siyam nga anibersaryo sang Maguindanao massacre subong nga adlaw Nobyembre 23, 2018.
Dugang pa sini nga tubtob yara ang abogado nila, igapakigbato nila ang hustisya para sa mga biktima kag indi man suno pa nila kinahanglan ang kwarta nga gintawag pa sini nga halin sa kinawatan lamang.
