KORONADAL CITY – Halos 70 ka mga indibidwal ang naaresto sang kapulisan sa ginpatigayon nga Regionwide Simultaneous Anti Criminality Law Enforcement Operations (SACLEO) sa Bangsamoro Autonomous Region o BARRM.
Kadungan sini, ginadayaw ni PRO-BAR Director PB/Gen Arthur Cabalona ang PNP-BARRM sa pag-arestar sa 63 tanan ka mga indibidwal sa sulod sang isa lamang ka adlaw nga police operation.
Suno kay Cabalona, kalakip sa mga kaso sang mga naarestar ang mga naglapas sa loose firearms ukon RA 10591, paglapas sa Comprehensive Dangerous Act of 2002 ukon RA 9165 kag pag-arestar sa mga wanted person, anti-illegal logging subong man ang anti-illegal gambling.
Sa nasambit nga operasyon, 27 ka mga drug personalities ang nadakpan gikan sa ginpatigayon nga napulo ka adlaw nga separar nga anti-illegal drug operations kun diin kabug-usan nga Php 207, 832.00 nga kantidad sang droga ang nakumpiskar.
Sa operasyon naman batuk sa mga wanted person, 13 katawo diri ang nadakpan paagi sa warrant of arrest, kalakip na ang no. 2 wanted person sang Lanao Del Sur PPO kag no.3 sa municipal level sang Maguindanao PPO.
Nakakumpiskar man ang PRO-BAR sang 47 loose firearms lakip na diri ang high powered firearms kasubong sang Rifle Propelled Grenade, Snipers Rifle, M16 A1 rifle kag M14 rifle.
Sa subong padayon ang preparasyon sang Bangsamoro Police sa nagahilapit nga National kag Local Election kag mas ginpahugta pa ang kampanya agud nga mapunggan ang nagkalain-lain nga krimen sa nagahilapit nga May 9, 2022.
