KORONADAL CITY – Naglab-ot sa lima ka pamilya ukon 17 tubtob 20 ka indibidwal gikan sa Purok Tolentino, Barangay Morales ang ginbakwit sang mga responders matapos mabahaan ang ila panimalay bangud sang madalom nga tubig-baha nga naghalin sa padayon nga pag-ulan.
Sa interview sang Bombo Radyo kay Cyrus Urbano, sang City Disaster Risk Reduction and Management Office (CDRRMO), gilayon nga nagresponde ang mga otoridad sa insidente kag gindala sa Barangay Hall sang Barangay Morales ang mga pamilya agud makapahuway kag masiguro nga luwas sila.
Dugang pa ni Urbano, pagahatagan sang hot meals halin sa Philippine Red Cross–South Cotabato Chapter ang mga nagbalakwit nga pamilya.
Samtang, sa Barangay Zone 3, may ginreport man nga pagbaha apang nagasubside na ang tubig samtang padayon nga ginahimo ang paglimpyo sang mga drainage system sa lugar.
Magluwas sa mga namensiyonar nga barangay sa National Highway sa Gensan Drive, ginpahayag ni Urbano nga dapat maghalong ang mga motorista bangud sa pag-awas sang tubig sa kanal, apang ginapatigayon na subong ang clearing operations agud mabalik sa normal ang dalagan sang trapiko.
Kaangot sini nagapanawagan ang CDRRMO Koronadal sa publiko nga maghalong kag likawan anay ang pag-agi sa mga lugar nga ginabaha samtang padayon nga ginabantayan ang sitwasyon sa syudad.
