KORONADAL CITY- Nagbilin sang danyos sa pila ka puluy-an kag kumbuyuhan ang nagluntad nga mabaskog nga hangin kag ulan sa banwa sang Tupi, South Cotabato.
Sa report nga ginpalab-ot sa Bombo Radyo Koronadal sang PDRRMO South Cotabato, 9 ka puluy-an ang partially sa Barangay Poblacion kun sa diin nagkakas ang mga atop sini samtang ang iban naman ang gintabunan sang nagkalagabot nga kahoy.
Magluwas sini, yara naman sa 10 ka kahoy ang nagkalagabot bangud sa buhawi kun sa diin na-igo pa sini ang isa ka gasolinahan kag isa ka vulcanizing shop.
Yara naman sa 4 ka mga poste sang kuryente ang nagkalatumba.
Wala naman suno pa sang napagkit nga pilason sa nasambit nga insidente.
Sa karon, nagapadayon pa ang assessment sang Tupi Municipal Disaster Risk Reduction and Management Office sa ginbilin nga danyos sang nasambit nga buhawi.
