KORONADAL CITY – Ginbanatan ni Maguindanao Del Sur Governor Bai Mariam Sangki Mangudadatu si South Cotabato Governor Reynaldo Sucayan Tamayo sa isyu sang suno pa pagpanghilabot sini sa pamulitika sa BARMM Region.
Ini magluwas kay Mayor Raida Maglangit sang Kapatagan Lanao Del Sur nga amo ang nagbuyagyag suno pa sang pagpamahog nga ginhimo ni Governor Tamayo sa mga alkalde nga indi magsuporta sa United Bangsamoro Justice Party (UBJP).
Sa ginpatigayon nga BARMM Grand Coalition General Assembly ukon BGC sa Bongao, Tawi Tawi sang naglabay nga sabado, ginpabati-batian sang gobernadora ang suno pa pagpamilit ni Tamayo sa pila ka mga alkalde sang BARMM nga magsuporta sa pambato sang administrasyon sa 2025 Election.
Suno kay Bai Mariam, dapat pabay-an sila kag hatagan sang kahilwayan nga magpili sang lider nga magapamuno sa BARMM Region.
Nahibaluan nga nag-ugat ang isyu sa isa ka pagsinapol sang mga alkalde sang BARMM kaupod si South Cotabato Governor Reynaldo S. Tamayo Jr sa Manila sang naglabay nga June 24,2024.
Ginpanginwala naman sang UBJP Party ang nangin pahayag ni Kapatagan Mayor Raida Maglangit labi na ang alegasyon nga kun indi magsuporta ang mga alkade, igapaidalom ang mga ini pag-audit sang Commisson on Audit.
amtang nagpaguwa man sang pamahayag si MILG BARMM Minister Sha Elija Dumama Alba nga wala sang kamatuoran ang ginbuyagyag ni Mayor Maglangit.
Suno pa kay Alba nga yara sa 78 ka mga Alkalde ang nagtambong sa hinambitan nga pagsinapol kun diin 6 sa mga Mayor ang nagikan sa Sulu nga nagkumpirmar nga magatambong apang wala makaabot.
