Malipayon nga ginpahayag ni Cristelle Sarcauga, Gold medalist sang Batang Pinoy 2025 sa Weightlifting 90kg sang Rizal ang iya nangin kadalag-an sa pag-angkon sang medalya kon sa diin una na nakita ni 2020 Tokyo Olympics Gold medalist Coach Hidilyn Diaz-Naranjo ang potensyal sa Weightlifting.
Sa eksklusibo nga interbyu sang Bombo Radyo Koronadal kay Cristelle, ginpahayag sini nga permi niya nakita sa mga balita kag social media si Hidilyn Diaz-Naranjo bangod sa representasyon sini sang pungsod sa nagkalain-lain nga kompetisyon sa larangan sang Weightlifting gani nangin inspirasyon niya ang 2020 Tokyo Olympics Gold medalist kag nangin coach pa sa iya mga laban nga iya ginasalihan.
Dugang pa sini, dako nga bulig sa iya abilidad sa Weightlifting ang tanan nga laygay ni Coach Hidilyn para makuha niya ang mga medalya sa tagsa ka paindis-indis nga iya ginasalihan. Laygay naman sini sa tanan nga mga atleta nga dapat mangin consistent sa trainings kag magpamati sa tanan nga laygay sang mga coaches para ma-improve pa ang bisan ano nga hampang sa ano man nga larangan sang isport.
Una na ginpahayag ni 2020 Tokyo Olympics Gold medalist Hidilyn Diaz-Naranjo nga ginakonsiderar niya nga weightlifting hub sang pungsod ang Zamboanga City kon sa diin ini naghalin kag nagasunod naman diri ang lugar ni Cristelle Sarcauga nga Rizal.
