Nagapadayon ang repatriation efforts sang gobyerno agod masiguro ang kaluwasan sang mga Pilipino gikan sa Middle East sa tunga sang nagapadayon nga tensyon sa rehiyon.
Suno kay Department of Migrant Workers (DMW) Secretary Hans Leo Cacdac, 442 ka mga Pinoy ang safe nga nakapauli sa pungsod sakay sang isa ka Philippine government-chartered flight nga naghugpa sa Ninoy Aquino International Airport (NAIA) Terminal 3 kahapon, March 14, 2026.
Ini ang kabahin gihapon sang whole-of-government response nga ginapangunahan sang DMW, Department of Foreign Affairs (DFA), Overseas Workers Welfare Administration (OWWA), Department of Social Welfare and Development (DSWD), kag Department of Health (DOH), nga nagatuyo nga masiguro ang kaluwasan sang mga Pilipino sa mga pungsod nga apektado sang sitwasyon sa Middle East.
Ginpaathag ni Sec. Cacdac nga kon sarado ang airspace sa pila ka mga pungsod, nagagamit ang gobyerno sang mga land crossing route agod nga ma-evacuate ang mga Pilipino pakadto sa mga lugar sa diin mahimo sila nga pasakyon sa flight pauli sa Pilipinas.
Samtang, ginpahayag naman ni OWWA Administrator Patricia Yvonne “PY” Caunan, nga yara na sa masobra sa 1,000 ka mga overseas Filipino worker (OFW) ang nakapauli gikan sa Middle East.
Naghatag naman suno sa iya sang welfare assistance ang gobyerno sa mga OFW lakip na ang pagkaon, hygiene kits, temporaryo nga ilistaran, kag ang transport assistance para sa mga magapauli sa ila mga probinsya.
