Importante gid nga maasikaso ukon maproseso ang pila ka kinahanglanon nga dokumento agud makadisplay ang pila ka stall vendors sang firecracker kag pyrotechnics.
Ini ang nangin pahayag ni Mary Ann Babayen-o, isa ka firecracker vendor, sa interview sang Bombo Radyo Koronadal. Suno kay Babayen-o, sila ang una nga nakadisplay subong sang ila mga produkto nga palupok sa bahin sang Brgy. Zone 2, Gensan Drive, siyudad sang Koronadal.
Suno pa sa iya, madamo pa sa iya mga kaupod nga vendors ang nagaproseso pa sang ila mga dokumento agud maka-qualify sa pagpatindog sang ila stalls. Madamo naman sila sang ginabaligya sa ila stalls, lakip na ang fountain nga naga-range ang presyo halin ₱80 tubtob ₱450.
Isa naman sa pinakamahal nga produkto nila amo ang 100 shots nga nagabalor ₱18,000. Dugang niya pa, magluwas sa pumuluyo sang Koronadal, may ara man sang nagabakal halin sa mga kaiping nga siyudad ukon banwa, lakip ang mga siyudad sang Heneral Santos kag banwa sang Tupi.
Ginaawhag naman ni Babayen-o ang publiko nga magbakal na sa ila kay bukas na ang pila ka stalls sang firecracker kag pyrotechnics sa siyudad sang Koronadal.
